政壇：洪為民游水每日30塘
好多名人都鍾意去馬會跑馬地會所泳池，嗰度亦曾爆出名人爭執事件，菁英會主席Witman洪為民都經常喺嗰度出沒，亦見過涉及爭執風波嘅名人。佢自稱係游水迷，每日要游三十個塘先安樂，正因為游得太多，泳褲損耗率好高，曾試過上水後發現臀部涼浸浸，原來泳褲穿咗個窿，所以要買定四至五條泳褲，以便隨時更換。
Witman係資訊科技界選委之一，講起新民黨葉劉淑儀參選特首唔夠票入閘，佢話都算識得葉劉，因葉劉○七年參加立會港島區補選時，佢都幫手助選，如今葉劉冇要求佢提名，可能唔記得咗佢，但佢唔會擺喺心度喎。咁會唔會主動提名葉劉？佢就話未必，因為依家都睇唔透邊個最好，無謂押晒喺一個人身上喎！
洪為民係游水迷，每日要喺馬會會所泳池游三十個塘至安樂。