自修室毒氣瀰漫 圖書館誤人子弟

自修室嘅功能係畀學生讀書溫習，不過事實係好多人喺入面同周公捉棋，原因可能來自兩方面。第一，學生本身因素，可能太懶，又可能太勤力，溫到通宵達旦，倦極而睡。第二，可能係中咗毒，被人靠害。

邊個咁大膽靠害學生？就係管理公共圖書館自修室嘅港府官僚。唔信？等太一叮帶大家去睇吓。

呢度係深水埗保安道公共圖書館自修室，咪睇面積細細，自修學生多達二百人，空氣相當侷促，唔好話畀大腦吸收知識養分啦，連正常呼吸都有困難。再用儀器一度，二氧化碳含量高達三千二百ppm，較良好級別指標一千ppm超出兩倍有多！二氧化碳濃度過高，必然令人昏昏欲睡，唔怪得咁多同學仔走咗去搵周公。

其他自修室嘅情況又點呢？灣仔駱克道嗰間嘅二氧化碳含量最高達三千ppm，油麻地嗰間亦有一千六百ppm，沙田嗰間好啲，不過都有一千二百幾ppm。專家表示，二氧化碳含量上到二千ppm水平，就會降低人嘅思考能力，三千ppm以上會影響判斷力，五千ppm以上會令人缺氧甚至昏迷。專家直言自修室嘅空氣情況極為惡劣，根本難以達至自修效果，反而愈讀愈蠢、愈讀愈癡呆！

自修室原意畀學生專心溫書，點知變咗莘莘學子嘅自修陷阱，講起上嚟，管理官僚係咪應該自修兩件先呢？毫無疑問，港產官僚應該係地球上最冇自省能力嘅哺乳動物，如果唔係，就唔會一句中央冷氣系統不能調校，就懶理學生嘅苦況啦。

最離譜嘅係，自修室變二氧化碳毒氣室，大部分政府辦公室嘅空氣質素卻達到良好級別。咦，內地黑心食物氾濫成災，高官闊佬懶理，皆因自家「官糧」確保安全吖嘛，既然港產官僚日日呼吸新鮮空氣咯喎，自然亦懶理學生愁困「毒氣室」啦！

即係咁，曾蔭權爆出「曾商勾結」醜聞，被人批評「只許特首收賄，不准公僕越軌」；唐英年爆出「唐宮」僭建風暴，被人譏諷「只許唐唐僭建，不准百姓上樓」。港府一哥同前任二哥都係只顧自己快樂，懶理市民死活，所以咯喎，學生自修室同政府辦公室分別咁大，根本就係「只許官僚醒神，懶理學生昏睡」！

空氣差影響思考，自修室害人子弟。唔該港產官僚快快「自修」，自我修正，無謂要學生上街反「曾商勾結」時，反埋你哋吖，叮！