政壇：蔣介石曾孫重塑上海雙妹
內地經濟起飛，奢侈品大行其道，巴黎、意大利嘅舶來品雖然領風騷，內地嘅老牌產品都趁勢重新出發，第一步梗係搵嚟富國際視野嘅大師重新打造形象，以「美加凈」品牌出名的老牌國企上海家化，早在○九年就已經搵嚟蔣介石曾孫、台灣知名產品設計人蔣友柏合作，其中一項工作就係包裝售價高達一千蚊一支嘅香水。
佢哋嘅合作項目包括有百年歷史「上海雙妹」品牌，「雙妹」香水每支售價最高達一千元人民幣，定價較歐美一線品牌有過之而無不及，除咗呢款產品外，仲有護膚品等，搵蔣家後人打造百年老牌，呢個構思本身已經夠煞食喇。
蔣友柏是蔣家第四代人物，從事設計的他與內地企業合作打造百年老牌。（資料圖片）