政壇：楊華勇仿古花車接新娘
菁英會常務副主席楊華勇（Johnny）三月下旬大婚，近期忙公司外，仲要籌備婚禮，真係周身唔得閒。早前見佢揸架紫色仿古車喺中環ifc停車場，車身立立令，有格調又夠搶眼。
Johnny話，架車係○三年購入，品牌係日本光岡（Mitsuoka），佢冇講車價，但據了解，呢款Galue II DX 3.0嘅仿古車，汽缸容量達三千C.C，夠晒好力，當年車價近五十五萬港元。架車雖然外形古董，但內櫳就絕不「老爺」，有齊現代化設備，難怪佢打算下月結婚時會用嚟做花車，佢仲話，唔排除稍後會買多一部喎，唔通想送畀未來太座？
楊華勇將心愛嘅Mitsuoka日本仿古車泊喺ifc停車場，部車下月會用來做結婚花車。
楊華勇下月結婚，嘉賓又點會少得菁英會一班兄弟吖。（資料圖片）