政壇：陳智思寸唐唐奄尖老闆

被踢爆僭建地下王宮嘅唐英年懶理民憤，繼續厚面皮周圍拉票，尋日出席社會企業無障礙的士「鑽的」搞嘅意念創作比賽時，竟然向中學生構思嘅社企計劃潑冷水，搞到富有社會福利工作經驗嘅亞洲金融集團總裁陳智思（Bernard）都睇唔過眼，暗寸佢好似做老闆咁對待學生見工，言下之意咪係太奄尖囉。

話說有學生建議寫一本關於香港三十至七十年代嘅書籍，賺到嘅錢會幫助啲公公婆婆裝設平安鐘，點知唐唐就質疑計劃嘅持續性，問裝完平安鐘之後嘅行政費邊個畀喎，個同學仔畀佢一拋，即刻唔知點答好。另一個男同學就提議搞間專幫後生仔搵工兼培訓嘅獵頭公司，點知唐唐就話獵頭公司做埋培訓，成本一定好貴。

唐唐自己領軍扶貧冇貨交，難得學生有諗頭，佢又一味潑冷水。結果Bernard都忍唔住幫班學生反寸唐唐一句：「依家好似見工咁喎！」