政壇：李大壯唔識醫插水唐唐
特首候選人唐英年（唐唐）被踢爆大宅僭建二千多呎地下王宮後，民望直插谷底。有份提名唐唐嘅全國政協李大壯，尋日就喺分屬「唐營」嘅經濟動力立法會議員林健鋒陪同下參觀添馬艦立法會新大樓。被問到唐唐爆完僭建再爆緋聞，仲有冇得救？李大壯就話︰「有冇得救？唔知喎，我又唔係醫生！」
唐唐被揭發任高官時涉肆意僭建，事後仲用調虎離山之計靜雞雞去咗中聯辦，咁啱李大壯早前亦去過中聯辦，大家都質疑李大壯係唔係去中聯辦幫唐唐求情，點知佢話︰「你查清楚啲fact（事實）先啦！」咁唐唐會否退選、或者有冇得救呢？李大壯都係一句唔知就算。
有份提名唐英年嘅李大壯話自己唔係醫生，唔知唐唐仲有冇得救。