搞搞政：莫宜端想睇穿領袖好壞

煲呔曾黐富商豪遊歎世界被本報踢爆後，「曾商勾結」醜行㷫爆全城，相信最感不忿嘅係十六萬公務員，政界新鮮人更加震撼不小，勞工及福利局政治助理莫宜端都喺社交網站facebook慨嘆，呢幾日對香港突然感覺好陌生，仲down到冇心情剝花生添，佢仲求主賜智慧畀佢，認清人嘅表面喎！

莫宜端喺微博中話，「這城的一切、領袖是好是壞，我們都有份，求主賜智慧，叫人穿越表面，明暸真象」，佢嘅困擾似乎暗合初二車公靈籤，邪鬼同神好難分，所以惟有祈禱主賜智慧，等佢睇清人嘅真面目。

政壇中人講得隱晦，敢言嘅才女「白姐姐」白韻琹尋日就一早打去香港人網大鬧煲呔曾貪得太Cheap，出賣港人尊嚴。白姐姐話：「貪坐遊艇又畀番錢，明知故犯，要畀就畀足錢啦！」佢仲話，如果煲呔曾唔提早落台，相信有一百五十萬港人上街，就算佢腳痛都會參加喎。白姐姐仲記得，當年煲呔曾做財爺時，曾被傳收過一籮大閘蟹禮物，佢只捨得用一隻嚟招呼民主阿婆，但民主阿婆想食多啲，佢當時嘅家廚于燕平於是發明用紅蘿蔔加醋變成蟹粉。