特殊教育缺學位 懶散官僚缺靈魂

可憐天下父母心，做父母嘅梗係希望仔女聽教聽話，成為用功讀書嘅狀元郎，但係，十隻手指有長短，如果閣下嘅小朋友唔屬於呢一類，甚至需要加強輔導，咁就頭痕嘞。嗱，管教小朋友固然費神，對住一班唔生性嘅港產官僚，更加激到你嘔血！嗱嗱嗱，今日太一叮要叮嘅就係教育局同社會福利署轄下嘅特殊教育服務！

今日講嘅特殊教育，同大家平日理解嘅特殊教育有所不同。有關學生嘅體格同智力與常人無異，但就學業成績較差，原因係喺成長階段出現適應困難，有中度至嚴重情緒及行為問題。幫助呢班學生嘅方法，就係安排暫時離開主流學校，去群育學校接受加強輔導。

以上個年度為例，申請入讀群育學校嘅學生平均每月為六百五十二人，而全港七間群育學校總共提供六百五十七個學位。咦，咁咪人人有書讀？咪住先，荒謬嘞，申訴專員公署調查發現，輪候入學嘅學生依然大排長龍喎，平均每月超過一百人，而且當中一成半嘅輪候時間仲超過半年添。搞乜鬼呀？

原來又係因循苟且嘅官僚陋習累事！公署踢爆，群育學校向當局匯報學位時側重「現有」空缺，對短期會出現嘅空缺就當睇唔到，但係當局一直不聞不問矇查查，於是編配學位時亂晒大龍，一方面成日有百幾個學位丟空無人理，一方面有幾百人等學位等到呆晒！

公署仲踢爆其他流弊，好似編配學位流程慢過蟻躝啦，對學生佔用學位超過兩年都熟視無睹啦，學生延遲入學又唔跟進啦。申訴專員黎年狠批，教育局同社署處事因循，未能設身處地急市民所急！

冇錯，港府關顧弱勢社群永遠到喉唔到肺，缺嘅唔止係資源，更加係急市民所急嘅靈魂。各位懶散官僚，兒童係社會未來嘅棟樑，特殊學童延誤獲得輔導，隨時糟蹋小孩子一生，不容輕視。大家知啦，港府高官其身不正，又有煲呔曾「曾商勾結」，又有唐英年「謊唐僭建」，家陣細路哥真係好易受污染o架！

總之，特殊學生入學難，當局必須快快跟隨申訴專員嘅建議糾正流弊。如果邊位官僚仲係諗唔通，唔該留番個學位畀自己，最需要輔導嘅睇嚟係閣下，叮！