政壇：搞搞政：鄉局大樓劇院加租兩成止蝕
新界鄉議局沙田石門新大樓因場地租金定價太過低，搞到即使租出都維唔到皮，由劉業強做主任委員嘅鄉議局管理委員會最近就決定增加大劇院場租填氹。
鄉議局決定今年四月一號開始調高新大樓內各場地嘅租金，好似音響設備正到可以開演唱會同做粵戲嘅大劇院咁，每逢星期五至日、及公眾假期等繁忙時間，每四小時收一萬六千八百元，之後每加半小時就收一千五百四十元，加幅足足兩成咁多。
團體如果要租用大劇院做綵排，或者其他冇觀眾嘅活動，租金可平一大截，四小時亦只需八千四百多元，加幅同樣係兩成。中肯講句，其實喺新大樓搞活動真係幾好，可惜局方宣傳仲係唔夠，搞到出租率始終麻麻，如果真係想搞旺個場，除咗要盡快啟用餐廳外，班鄉紳就真係要諗諗宣傳策略喇！
設計圖片及對白