政壇：謝瑞明彈唱天后雲妮上身
平時見到Banker西裝骨骨，但當中可能隱藏唔少舞台王者。講緊嘅喺星展為員工舉行才藝表演比賽，兩位星展香港副總裁技驚四座，下個月將參加總決賽。
要喺芸芸Banker中脫穎而出一啲都唔簡單，優勝者之一嘅Nelly謝瑞明自彈自唱三首Whitney Houston（雲妮侯絲頓）嘅名曲，呢位天后剛逝世嘅消息轟動全球，呢個時候揀選天后名曲，充分表現咗Banker審時度勢嘅能力。Nelly唔單只靠歌聲攝人，佢人緣應該好好，皆因新升任零售銀行業務董事總經理嘅鍾少權，連同近百位零售銀行同事專程捧佢場。
