港鐵執法懶懶閒 車廂淪為大笪地

近排搭港鐵係咪覺得車廂有陣火藥味？冇錯嘞，北大孔叫獸鬧香港人係狗，咪就係有內地人喺車廂飲食引起囉，搞到中港矛盾惡化，同胞勢同水火。

港鐵車廂何止有火藥味，仲有騷味、臭味添。網上短片所見，有人喺度開大，有人喺度開細，亦有人喺度隊酒食煙，總之做乜都有，認真夠誇張。

港鐵話喎，舊年乘客喺付費區內飲食獲發警告信，比前年大增三成四，但冇提供涉及內地旅客嘅數字。港鐵話下月初會更新「不准飲食」海報。署理運輸及房屋局局長邱誠武話，港鐵會定期透過廣播同宣傳，教育乘客。

唉，呢個高官唔知係太無知吖定係太天真。照佢嘅邏輯，既然全港周圍都貼咗「請勿吸煙」，禁煙辦豈不是可以摺埋？如果齋靠「溫馨提示」，靠乘客自覺發揚公德心就可以解決問題嘅，就唔使搞到今時今日中港矛盾激化，同胞關係受損咁大劑啦。

正所謂，各處鄉村各處例，唔係所有地方列車車廂內都禁止飲食，所以，外來人士唔知香港規矩一啲都唔奇怪。事實係，○三年開放港澳個人遊之後，內地同胞赴港數字不斷增加，唔知情之下觸犯相關法例嘅個案亦水漲船高。

但當局關人個關，並冇相應加強宣傳，執法更加係懶懶閒，直到「點心麵」事件爆發，令兩地關係惡化火上加油，叮！

弊在港鐵根本就冇吸取教訓，執法寬鬆，違例情況愈來愈厲害。呢，最近就有人透過網上視頻爆料，畫面上三名南亞裔青年居然喺港鐵東涌線車廂「開Ｐ」，旁若無人坐喺地下隊酒食煙，飲到興起連衫都剝埋。拍攝者即時向港鐵投訴，對方派人求其上車望吓，就話冇發現有人食煙，當冇件事，簡直離晒譜。拍片嘅市民直指港鐵怕麻煩唔執法，感到非常失望。

維持車站範圍同車廂公共衞生，港鐵責無旁貸，有法不執就係失職！亡羊補牢，依家至加強宣傳教育總好過乜都唔做，但如果執法跟唔上，法例一樣係無牙老虎。

港鐵執法懶懶閒，車廂淪為大笪地。計太一叮話齋，如果繼續有法不執，執法不嚴，一味齋噏，港鐵車廂遲早淪陷，變成大牌檔甚至「公廁」嘅咋，叮！