政壇：搞搞政：盲目挺唐大輝家奴上身

唐唐被踢爆僭建地下行宮同「攬女」連串醜聞後，竟然唔知醜報名參選特首。人稱唐唐「家臣」嘅立法會議員林大輝尋日就喺電台節目度死撐，話報名係按既定嘅時間表進行，並唔係因為怕支持者流失所以「搶閘」，又話報咗名之後都仲收到唔少提名表，包括九倉集團主席吳光正等。

呢番言論即時惹起網民怒轟佢係擦鞋仔。網民angchunyong話「佢係唐家三世家奴，當主人受到攻擊，自然係盲目護主」。網民NoName就話「令我想起以前董建華的家臣路祥安」。以前有人嘲諷路祥安叫「路公公」，大輝咪即係「林公公」囉！

大輝又話唐唐嘅誠信對選委嘅提名意向影響唔大，結果被網民lokchanhk 反擊︰「當然不大啦，選委的提名意向是基於他們的利益嘛，只要繼續有利益輸送，他們仍會支持唐英年的。」網民Sc亦留言「我想話畀林大輝狗賊知，事實係現在每日都有好多人反唐狗！」