監管劏房權宜計 治本還是建公屋

作死咯！曾蔭權身為最高公僕，居然光天化日……吖，唔係，係鬼鬼祟祟同富豪坐超級遊艇玩轉澳門，話冇「曾商勾結」，細路哥都唔信啦！

即係咁，見到煲呔曾咁識歎，太一叮不禁諗起佢嘅金句：「香港冇人無瓦遮頭！」係o架，香港人人都有瓦遮頭，分別只係高官權貴匿喺豪華遊艇歎世界，而基層市民就捱籠屋、棺材房同劏房咁解。

冇錯，形容市民蝸居劏房係捱世界，相信冇乜人會反對。其他唔講吖，一個火警危機問題，已經足以令居民提心吊膽過日子。如果唔係，港府就唔使補鑊，建議立法將劏房工程納入監管啦！

大家可能會問，舊樓劏房又冧過樓，又燒死過人，乜仲未立法監管嘅咩？係呀，到家陣仲係無王管o架！只要業主夠諗頭，將豆腐膶房間再𠝹多兩個單位又得，喺碌架床隔籬加多個廚房亦得，將逃生樓梯口改窄啲都得，得咗！

當然啦，冇違法唔代表冇問題。如果唔係，劏房問題就唔會成為都市炸彈啦。土瓜灣發生冧樓慘劇，就係疑因私自拆走主力牆所致，旺角花園街一場大火造成死傷枕藉，亦係懷疑劏房惹禍。當局加強監管，規定劏房工程須由認可專業人士進行，叫做遲到好過冇到啦，嗱嗱嗱，今次唔好又雷聲大、雨點小呀！

之不過咁，太一叮始終有個疑問，就算劏房工程得到監管，定時炸彈係咪就叫做成功拆除呢？一個放喺柴火上嘅石油氣罐，你攞走其中幾支柴火，係咪就安全呢？傻嘅都識答你，梗係唔係啦！

劏房單位人多擠迫、走火通道狹窄、雜物堆積，一旦發生火警，後果非常嚴重。劏房居民要避過一劫，最治本嘅方法始終係搬離呢種港式貧民窟。但係，令人無奈嘅係，啱啱有調查公布，香港租金貴到位居全球第一，基層市民想唔住劏房，唯一辦法就係瞓天橋底，都係叫做有瓦遮頭嘅。

所以咯喎，港府如果真係有心拆除劏房炸彈嘅話，就應該興建更多公屋，畀合資格市民盡快上樓！

話時話，劏房除咗安全隱患、環境又擠迫、衞生又差劣，公屋上樓的確係好多劏房居民嘅心願嚟o架。唐英年唔小心將約道七號「挖深咗」，都有間二千幾呎地下王宮啦，基層市民想分配到間公屋，唔使提心吊膽過日子，都唔過分啫，吓話，叮！