SUN微博：打橫嚟講：馬交朋友

馬交姑爺仔曾蔭權，矮小自大，縮骨蠱惑，貪威好食、小器卸膊的品格，全人類知曉。

曾蔭權私會江湖有背景的Macau Fan，被傳媒揭破後，死撐話係自費過大海祭祖，說的不眨眼，聽的很奇怪，乜解究，要坐過億元豪華遊艇去o架呢？你幫兄弟，又竟老友到同你一齊上路拜山？幾趣致喎！

曾蔭權之不得港澳市民人心，因佢愛威擺款之勢，仲勁過我國偉大的領導人，嗱！我不會亂說話的，實情有證有據，當這自詡尊貴的曾特首一上任，就重金搵人設計咗隻名為「香港飛龍」嘅神獸，暴現香江，象徵聖人降臨。

「香港飛龍」，形似一隻着火慘叫的濕水狗在狂奔，另有說十足十哈巴狗或雞屎窟。

曾特首自比「香港飛龍」，此乃他的自由，又確實入型入格；他又愛將「飛龍」製成別針，終日扣在衣領外，叫人敬拜，咁無乜所謂啫！最乞人憎都係曾特首命令政府做了一隻嘥電到無倫的大飛龍，光燦燦地起在灣仔某大廈天台上，每月電費幾十萬，一年計落，要港人科水幾百粒，又曲線益電力公司，兼不環保。

還有更令人火爆的，是幾年後，佢又豪氣地叫人修改「飛龍」造型，只加幾條有色線條，又百幾萬，威就曾特首攞晒，錢就由港人支付，真Macau Fan。

就係敢爆：政治人物惹桃色醜聞

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

歡迎add我facebook一齊鬧爆夕陽政府

彭志銘

次文化考古學家，對城中潮語有深入研究，博徵博引，廢官廢人行埋一邊。