SUN世代：美容背後新「機」遇

「創業無話一定成功，所有成功故事背後都要付出同努力！」陳映彤（Anna）深明幸運之神只會眷顧不斷努力的人。她大學畢業不久便膽粗粗創業，售賣美容器材，曾為拉客通街走兼洗樓，行到腰痠背痛也未叫苦。經過多年奮鬥，Anna終修成正果，她以自身經驗勸勉年輕人：「做人千祈唔好怕辛苦，唔好怕捱，呢樣係成功嘅先決條件！」

內地出生的Anna，五歲時與家人來港定居，一切重新開始，努力適應新移民生活：「當年爸爸身上得十三蚊，仲要打五份工養家，生活好苦！」童年艱苦，Anna住過板間房，又試過寄居姑媽家中，同學就有人照顧，可以靜靜地做功課，她與哥哥則要到街巿幫媽媽賣麵。刻苦生活令Anna從小養成自立、不怕捱苦的性格。

「一切得來不易，我要努力鞭策自己。」Anna勤學有功，考入香港科技大學工商管理學系，更以甲級榮譽畢業：「父母咁辛苦供書教學，想我生活好啲，所以我要努力讀書報答佢哋！」

洗樓搵客 腰痠背痛不叫苦

一張靚「沙紙」不代表成功，Anna認為優異成績只是踏入社會的最低門檻，成功與否，實戰經驗最重要。畢業後，Anna任職美容公司，一年後便決定創業：「當時接觸到美容業，慢慢培養出興趣。我唔係貪靚嘅女仔，但覺得美容係一門高深嘅學問，覺得有得做，喺九八年就成立咗間公司！」

為了深入了解美容業，Anna特別進修專業美容師課程。創業初期資金不足又無客源，Anna與哥哥親自洗樓搵客，行到腰痠背痛也不敢嗌攰，見客碰壁亦不言放棄：「我同哥哥試過搵唔到客，返到屋企望住大家喊。不過開咗條路就唔應該咁易退，畀啲時間自己，如果努力咗都唔得先算！」

幾經堅持，Anna的公司漸上軌道，更找到了經營方向，由售賣護膚品變成專賣美容器材：「當時護膚品巿場競爭好大，我諗究竟咩產品先可以突圍呢？結果發現好少人做美容儀器，仲好好彩搵到一部香港無嘅激光機，於是就循呢個方向發展。」

以為已經捱過最艱難的時間，Anna卻再次遇上事業低潮：「公司成立第三年係一個Big Change，當時由貨倉仔搬上寫字樓，但突然所有員工走晒！」面對員工的離開，Anna以阿Q精神面對：「我會用時間同努力去證明！」日子有功，Anna除重拾客戶信心外，更成功開拓內地及海外巿場。

Anna做事有個原則，堅持每年為巿場尋找新元素：「創業十幾年，好多人都問我仲有咩新儀器未有同有咩新元素，雖然係難，但我會堅持繼續求新，未來我會專注內地巿場。」

Anna's Profile

現職：南明美容集團有限公司董事

學歷：科技大學工商管理系巿場學學士、城巿大學行政工商管理學碩士

興趣：旅遊、行山、看電視

公職：香港中華廠商聯合會會員