政壇：政商定格：方文雄接投訴發掘設計師
協成行集團首次進軍酒店業嘅代表作，佐敦長樂街一號嘅「木的地酒店」（Madera）前晚隆重開幕，協成行兼木的地酒店董事總經理David方文雄仲親自擔任導賞員帶政商界老友參觀酒店。
酒店其中一間最大嘅九百幾呎房中之王，一入房就見到開放式嘅客廳同睡床，中間仲放咗個大浴缸，前衞大膽嘅西班牙風情令嘉賓驚喜不已。點解走西班牙設計路線？原來有段趣事。David話年幾前佢親自處理一宗旗下豪宅單位嘅租客投訴，投訴者正係酒店女設計師Gemma Fletcher，就此不打不相識，一拍即合，齊齊打造夢中嘅旅者居停。
浴缸放喺房間嘅當眼位置，充滿異國風情。
方家三代齊見證開幕之喜，後排左起：方文雄、囝囝方添輝及方太符世蔚，前為方潤華。