政壇：人民力量斥《蘋果》失實
《蘋果日報》又被人批評不盡不實喇！人民力量主席劉嘉鴻尋日發表聲明，批評前日（二十日）《蘋果日報》李八方「隔牆有耳」一篇以「得罪黃毓民 任亮憲被飛」為標題嘅報道內容不盡不實，貫徹《蘋果日報》一向嘅卑劣嘅新聞作風，以無聊嘅道聽途說肆意抹黑人民力量執委黃毓民及任亮憲，用心惡毒，予以譴責外，亦重申會杯葛壹傳媒旗下所有報章雜誌嘅立場。
劉嘉鴻之所以咁o架，原因係有關報道話聽聞任亮憲因為年初同毓民頂嘴，所以毓民牽頭嘅「六人小組」決定任亮憲冇得代表人民力量參選立法會。劉嘉鴻解釋，六人小組係由佢成立，唔係毓民，而且只係用來商議遴選機制，根本冇決定參選人嘅權力，所以並非如報道所講嘅「私下拍板」。
劉嘉鴻又表示，覺得報道係惡意挑撥佢哋執委會同各執委間嘅關係喎。