政壇：搞搞政：高達打唐幫鐵頭仁造勢

白鴿黨議員「高達」李永達上星期提過條急切質詢，問有關特首參選人梁振英被指漏報西九利益單嘢，可能佢食過翻尋味，打算今日重施故技，追問已成為候選人唐唐嘅僭建醜聞。

高達要提嘅急切質詢本應由立法會主席曾鈺成審批，偏偏曾鈺成冇嗰樣整嗰樣話要考慮參選，為免利益衝突，所以內務委員會尋日要開特別會議，事先幫佢過一過冷河。高達就喺會上話，公眾關注唐唐僭建門，事關重大，上星期佢都問過西九，今日就應該跟進僭建門啦！

但人民力量議員大舊陳偉業拆穿白鴿黨嘅西洋鏡，質疑白鴿黨此舉係為佢哋嘅特首候選人鐵頭仁造勢。大舊鬧高達係政棍、無恥，事關鐵頭仁都報咗名參選特首，白鴿黨連番追問鐵頭仁對手嘅醜聞，豈不是將立會變成選舉活動場所？最終仲否決埋高達嘅急切質詢，但最終審批權仍喺主席手上，大家今日拭目以待。