雙非產子斷擔挑 救護服務也淪陷

「兩個就夠晒數！」呢句經典廣告標語喺七十年代街知巷聞，諗唔到呢支歌仔家陣居然成為消防處救護員嘅心情寫照。

乜嘢事呢？唔通做嗰行厭嗰行，救護員放咗工就安全措施不設防，人人「搞出人命」？嗱，係就係生仔，不過唔係救護員，而係「雙非」孕婦。過去四個月，消防處幾乎每日要處理一點八宗非本地孕婦嘅緊急分娩求助個案，單係上月，平均每日就有兩宗。

最大問題係雙非孕婦為怕被拒諸門外，通常穿咗羊水至叫白車，令難產風險增加。救護員工作量增加都算嘞，最驚真係搞出人命，甚至一屍兩命，咁就大件事！對救護員嚟講，雙非孕婦每日叫白車搶閘，莫講話兩個夠晒數，簡直係一個都嫌多。問題如果惡化落去，本港救護服務遲早斷擔挑添呀！

唔講唔知，喺雙非孕婦洪潮之下，救護員變成接生婆，居然冇加強培訓，只靠「煲碟」自修，連臨床訓練都冇。雙非Ｂ緊急搶閘，救護員接生手震，冇搞出人命算好彩咯！

雙非孕婦問題尾大不掉，最初係產房淪陷，然後係嬰兒深切治療部，再到育嬰院，家陣緊急救護都被波及。喺呢個時候，邊個應該出嚟肩負救急扶危嘅重責呢？

梗係港府啦！只可惜，港府對問題拖拖拉拉，推出所謂四招行政措施，根本治標唔治本。嗱嗱嗱，消防處救護員接生手震，另一個生手「救護員」對住雙非孕婦問題更加係手騰腳震，呢位就係食物及衞生局局長周一嶽。喂，周救護，雙非問題拖無可拖，家陣連救護服務都就快淪陷，你肯出動未呀？

仲有一位救護員叫曾蔭權，佢翹埋雙手等收工，寧願過澳門同班江湖大佬歎春茗，都懶得費神幫香港人拆除雙非炸彈。咁無膊頭，咁無腰骨，煲呔曾不如即時辭職退休啦！

其實，雙非孕婦問題唔係冇辦法根治，正如好多學者話齋，提請人大釋法，取消雙非嬰嘅居港權就一勞永逸嘞。但係唔知煲呔曾同周一嶽係扮聽唔到，定係已經癡呆，總之就係唔做，你吹得佢哋脹咩！

煲呔曾，周一嶽，聽話啦，生性啦，快快解決雙非孕婦問題，咪再唔嗲唔吊嘞。你哋唔係想激到本地大肚婆發起集體叫白車行動，癱瘓救護服務，你哋至做嘢呀？叮！