SUN微博：打橫嚟講：香港看門狗

自曾蔭權獲英國封爵後，便知英國國運衰敗，若還有少許普通常識的，都知此人德行粗鄙，派他做廁所所長，也嫌佢臭過屎坑，怎會送他一個玷污爵士名銜機會o架？佗衰家！

畀佢做香港特首，不是港人所願，八年劣績，比老董腳痛前更坎坷，可見此人poor guy無倫！

曾蔭權身為香港特首，應分要全心全力守護香港，猶如一隻看門狗，終日保衞門庭，怎可以鬼鬼祟祟擅離職守，潛水鼠過大海，同班大佬兄弟埋堆、四四六六吹水爆湧晒雷氣？畀記者撞破時，佢竟然似足D&G的黑人食蕉咁，伸手擋鏡頭，真叫港人蒙羞，香港之恥也！

香港特區廢柴政府等收工唔做嘢，一切源自這個曾特首之積極不干預，大家鬥hea所至，連傳媒查詢他過大海之問題，亦選擇性不回覆，但我仍要問，今次非公務性質去澳門坐船定坐直升機呢？費用誰付？是次賭廳晚宴一席幾錢？有無魚翅食？每客幾銀？誰科水？事敗着草去消夜飲紅酒，同邊幫人一齊？講過乜？使費幾多及有冇爭找數？請答！

年初車公降壇講過「何為邪鬼何為神，神鬼如何兩不分」㗎啦！真靈驗，曾特首，你真巴之閉，除咗英國爵士「皇氣」照住之外，還黑白不分呢！不過，請勿忘記，你始終是看守着香港的一隻狗！

彭志銘 次文化考古學家，對城中潮語有深入研究，博徵博引，廢官廢人行埋一邊。