政壇：鄭承峰餐廳冧爆靚女
早前講過仁濟醫院副主席兼東區區議員Baldwin鄭承峰開咗間「壹玖捌叁」餐廳，卓悅集團高層、仁濟總理Erica鄧肇殷日前相約Baldwin試菜，仲傾吓即將登場嘅派福袋活動。
Baldwin介紹好多拿手好餸，包括惹味嘅七味椒鹽茄子、滋補嘅鮑肚瑤柱金腿燉菜膽湯，食到靚女讚不絕口。港人出晒名忙碌，食晏時間至緊要快，所以餐廳喺午市時間推出多款快靚正麵食。是日行政總廚黎師傅特別介紹龍皇海鮮金絲麵，純手工炮製嘅麵底同主菜分別以雙層蒸籠上枱，既精緻又有心思。再加上味道醇厚芳郁嘅「鳳凰單欉」靚茶，食得豐富又健康。
鄭承峰（右）同鄧肇殷（左）齊歎美食。
龍皇海鮮金絲麵食得又有睇頭。
味道醇厚芳郁嘅「鳳凰單欉」。