政壇：搞搞政：譚志源推出缺建制派護航

政制及內地事務局前局長「林公公」林瑞麟舊年強推立法會替補機制，引發逾二十二萬人七一上街，最後被迫跪低撤回方案。依家替補機制已改名作出缺安排，剩係禁止辭職議員六個月內再參選，但會繼續搞補選。新任局長嘅譚志源亦堅稱新安排獲民意支持，連大律師公會都冇話違反《基本法》，有信心可順利過關喎。不過，譚志源最後都係搵咗接近三十個建制派議員，冧友加入有關草案委員會幫自己壯膽，可見佢對呢個新方案都唔係咁有信心。

負責審議出缺安排嘅立法會草案委員會前晚截止報名，全體六十名議員之中，有三十五人報名參加，當中只有八名泛民主派，其餘二十七人都係建制派，其中建仔派出多達六人，工聯會、經濟動力同專業會議更加全民皆兵，各自派晒四名議員入會，認真誇張，唔使講都知係政府喺背後發功，要求佢哋瞓身力撐出缺安排喇！不過佢哋係咪可以人多蝦人少力保出缺安排過關，最後都要問過民意先知。