「玩具大王」蔡志明嘅囝囝、喜運佳鐘錶主席蔡加讚（Karson）尋日現身中環，接受一間電訊公司送上全城第一部4G智能手機，活動上仲有性感美女參加宣傳。加讚啱啱同女友汪圓圓度過拍拖後第二個情人節，佢話今年訂咗間餐廳同女友撐枱腳，又送上條珍貴項鏈，而女友就回贈一條親手做嘅飾物。
過年時與女友同遊杜拜嘅加讚話，最難忘杜拜嘅反常天氣，原本諗住當地熱辣辣，於是帶咗泳褲等裝備去享受吓陽光與海灘，點知沙漠天氣多變，佢同女友去到之後，氣溫急降只得十幾度，凍到令行程變晒樣。
蔡加讚同美女現身中環，吸引唔少途人圍觀。
