政壇：郭妤淺啃鑊 成港太模範

特首參選人唐英年（唐唐）嘅九龍塘大宅僭建咗個超豪地下王宮，唐唐連日大話連篇，抬出有膊頭有腰骨嘅金句，點知佢口中嘅「挖深咗嘅窿」卻被揭發係二千二百呎嘅王宮，誠信破產後，唐唐再嚟一招責任大轉移，將責任推晒畀太太郭妤淺，呢一幕真係傷透好多女人心，咁唐太呢？有唐唐鄉里兼城中名人就認為唐太應獲「香港太太」之冠喎！

浙江省政協、時代裘皮動物有限公司董事總經理單志明話，當日睇到唐太喺鏡頭前喊到梨花帶雨，一句僭建「係我一手搞出嚟」，真係心都噏埋，佢即刻向身邊嘅太太話，要學吓唐太點做人老婆至得，唐太第一次現身為老公拆感情缺失嘅炸彈，第二次又要啃晒僭建嘅大鑊，畀枕邊人跣到冇面見人實在好偉大。

所以佢認為唐太應獲「香港太太」之名，外加「最能容忍」大獎，兼且以唐太將地牢設計成王宮嘅超卓品味，掃埋「最高設計能力」大獎都仲得！單志明鄉下同唐唐嘅家鄉江蘇無錫好近，但佢對鄉里亦一樣唔畀面。