政壇：田二少扶貧擬買一送一
新民黨副主席田北辰（田二少）曾參加過電台節目《窮富翁大作戰》，親身體會過貧窮嘅滋味，知名度增加外，亦令佢對扶貧有更深嘅想法，早前佢同細女Lavina傾開，先知道兩父女嘅理念原來好一致，依家正構思個「買一送一」嘅扶貧計劃。
身為G2000嘅老闆，田二少認為唔少貧窮地方嘅日常生活用品缺乏得可憐，莫講話係襪，分分鐘連鞋都冇得着，所以好想幫助吓呢啲貧困地區。咁啱囡囡Lavina曾經參考過一個美國著名造鞋品牌TOMS，秉持住「顧客買一對鞋，公司送一對鞋畀貧童着」嘅理念，令唔少貧童擺脫冇鞋着嘅命運。