政壇：搞搞政：方剛返內地唔敢揸車

煲呔曾夕陽政府未經諮詢就強推粵港自駕遊，搞到今日好多市民湧上街，希望即刻叫停，反對聲浪中，除咗同內地少溝通嘅泛民主派外，仲有經常往返粵港嘅建制派，好似富貴黨副主席方剛就認為，批准內地車駛來香港可能會引發災難，佢仲以自己為例，話佢返內地都唔敢揸車，寧願請個揸開中港貨車嘅司機好過。

方剛話，內地司機嚟港問題多多，即使本港司機揸車返內地都可能危險重重，相信最後申請嘅人唔多，就算政府堅持推行，計劃最終亦會慘淡收場。佢透露，自己好早就攞到中港車牌，以前偶爾都會自行揸車返深圳打高爾夫球，幾次之後，佢就覺得怕怕，尤其喺進出小路同停車場，揸慣右軚車嘅香港人好容易轉錯彎或望錯邊，一唔小心就會發生意外。

成日北上嘅人都唔肯揸，何況嗰啲攞一次牌北上嘅車呢？方剛認為，有錢人好易攞到中港牌，一般市民又要小心安全，估計港人申請自駕遊會非常少，最後只有內地人申請來港，對香港絕對唔划算喎。