政壇：應家柏幫施文信剪指甲
香港賽馬會主席施文信同行政總裁應家柏，尋日出席馬會「全方位學習工作坊」啟動禮，兩人大演創意禮物，齊齊氹長者，應家柏嘅係一個多功能指甲鉗，施文信嘅則係方便長者使用、裝有彈弓嘅易用筷子，真係別出心裁。
應家柏尋日喺活動上眾目睽睽攞起指甲鉗來，在場嘉賓都嚇咗一驚，佢唔係忙到連剪指甲嘅時間都冇？查實呢個係裝有放大鏡功能嘅指甲鉗，係佢親手挑選送畀長者嘅禮物，佢因此作狀剪指甲示範點用，仲作狀幫埋施文信剪指甲添，搞到全場爆笑。施文信嘅禮物一樣咁有心。
啟動禮上，逾一千五百名來自東華三院嘅高中學生與馬會義工隊成員，攜手創造巨型福袋及心形圖案，馬會稍後會向健力士世界紀錄申請成為全球最大嘅福袋。
應家柏（右）示範使用裝有放大鏡功能嘅剪指甲鉗，而施文信（左）則手持彈弓筷子。