政壇：蘇錦樑自閹商品例

應屆政府任期剩低約四個月，團隊中人有啲無心留、有啲就唔知有冇得留，舊年執到死雞、忽然上位做商務及經濟發展局局長嘅蘇錦樑就係徬徨中嘅一員，上任半年多都冇人知道佢做咗乜，尋日佢出席一個電台節目時，忽然拋出一個月內向立法會提出《商品說明條例》修訂，打擊常見嘅不良營商手法，並期望喺呢個立法會年度內搞掂，蘇錦樑臨急趕搭政績尾班車，都係想政績表現作零的突破，「破蛋」成功先有望避過喺新一屆政府組班時成為籮底橙嘅命運。

先搞不良營銷手法

蘇錦樑自去年中上任之後，話咁快半年就過咗去，佢主理嘅商務及經濟發展局，卻唔見有乜貨交，《競爭法》嘅草案工作至今都喺齋噏階段，重組旅遊監察架構一事又好初期，眼看六月三十日一日一日步近，真係有人歡喜有人愁。

尋日，蘇錦樑出席一個電台節目時，講到消費者權益及保障不足，佢即刻食住上，宣布一個月之內會向立法會提交《商品說明條例》修訂，但修訂只會先搞爭議冇咁大嘅不良營銷手法，如加入打擊威嚇、利誘銷售手法嘅懲處等，避免市民再受高壓推銷致誤墮消費陷阱，完成呢部分後，先會再處理消費冷靜期嘅問題。

佢話，咁樣做係先處理社會有共識嘅，然後繼續討論爭議及分歧較大嘅規管。其實，呢一招擺明係捨難取易，當然亦係先易後難，咁樣蘇錦樑就有望喺今個立法年度剩低嘅幾個月任期中，有一項政績交貨，爭取留低都冇咁肉酸喇。