溫水煮蛙自駕遊 一意孤行自丟架

跛腳鴨政府真係不知所謂，愈臨近收皮，做嘢愈無厘頭。嗱，自駕遊計劃有口皆「呸」，當局係都要撼頭埋牆，問你服未。

正所謂，眾怒難犯。十七個環保同宗教團體周日將發起大遊行，抗議港府黑箱作業，佢哋直指首階段自駕遊計劃根本係「溫水煮蛙」，為第二階段內地車南下鋪路，真係一針見血。

　其實，立法會日前亦通過決議，自駕遊必須得到社會共識至可以推行第二階段計劃。有議員直指港府倉卒推行惡政，難釋市民疑慮，要求煞停計劃。

呢啲就叫做民意嘞，當局聽到未吖。運輸及房屋局局長鄭汝樺仲死撐，聲稱首階段自駕遊只係試行性質，會做好檢討，次階段計劃開展前會先諮詢市民喎。

唔好再帶市民遊花園嘞！要諮詢點解早唔做，係要等第一階段實施之後至做，咁仲唔係溫水煮蛙？再講吖，民意其實好清楚，容許內地車輛自駕遊南下，對本港交通網絡、道路安全同空氣質素有百害而無一利，根本唔需要再諮詢。

鄭汝樺口口聲聲話，用綑綁形容自駕遊計劃「並不恰當」。其實，兩地交流講求對等，港府憑乜理由只實施首階段港車北上，拒絕第二階段內地車南下？咁豈不是製造矛盾，令中港關係更加惡劣？

近排因為雙非孕婦湧港、北大狗噏教授謾罵港人等事件，內地同胞同港人嘅關係已經劍拔弩張。港府擇惡固執，一意孤行推出自駕遊，直情係火上加油喇！

講真，本港擁有兩地車牌嘅車輛已經超過兩萬架，根本唔需要再搞乜嘢自駕遊。再講吖，如果港人要北上揸車遊山玩水，幫襯租車服務，唔使申請配額，又唔使為車輛維修同保養，咁咪仲實際。

計太一叮話齋，自駕遊計劃完全係添煩添亂，夾硬推行只會激化矛盾，製造衝突，港府與其自取其辱，不如知難而退，包括第一階段都要取消，以免招人非議，被內地同胞話唔公平。如果當局係都要撼頭埋牆咯喎，咁就與人無尤喇，叮！