政壇：搞搞政：西九比賽 別問

立法會行政管理委員會尋日設宴，款待為新大樓立過唔少功勞嘅人，堪稱添馬艦項目之父嘅建築師Rocco嚴迅奇自然係座上客。對於一手一腳設計嘅浩瀚工程由草圖變成現實，佢笑笑口話仲有好多嘢未搞掂㗎，事關添馬艦項目嘅重點係開放成條海濱長廊畀市民享用，依家條長廊仍在施工當中，任務未完成。

Rocco的確冇講錯，條海濱長廊仲未有影，怕且市民想享用嘅話不知等到何年何月，但係政府總部同立法會搬去添馬艦嘅前後雞犬不寧，先有警察執勤時跌傷，後有工人不幸因漏電被電死，跟住惡菌、毒氣接踵而來，呢啲都係煲呔曾趕入伙嘅錯。

Rocco都有參選十年前嘅西九概念設計比賽，咁啱當時比賽評審之一、特首參選人梁振英被指喺呢個比賽中漏報利益。問佢點睇呢件事，佢即時雞咁腳離開，猛話唔關佢事。漏報事件當然唔關佢事，因為佢只係參賽隊伍之一，佢又唔使驚得咁緊要嘅，睇怕係為咗明哲保身，唔想講多錯多啫！