政壇：袁莎妮老翻免費車船舊橋
炒政府魷魚唔做政務官嘅Shirley袁莎妮，轉任香港總商會總裁已半年，而佢嘅重要任務當然係要為呢間百年老店省靚招牌啦。
佢諗住翻啅舊年總商會一百五十周年免費搭電車同天星小輪嘅橋，準備喺五月二十九號總商會一百五十一周年生日當日，全港電車同兩條天星小輪航線全日免費，希望可以加深市民對總商會嘅印象。但今年嘅做法同舊年有啲唔同，市民係搭部分髹上總商會宣傳品嘅電車先至唔使畀錢。
特首參選人唐唐前晚又提到佢嘅感情事，有人重提同佢傳過緋聞嘅Shirley，但Shirley尋日就話，一切同佢無關，○七年佢已經唔係唐唐嘅私人助理，佢講笑咁話冇去過僭建嘅地庫，總之一切關於佢舊老闆嘅嘢，佢唔講喇。
袁莎妮諗橋幫香港總商會省靚招牌。（資料圖片）