政壇：林建岳續被大字報追殺

尋日講過特首選舉參選人唐英年醜聞不絕，咁啱佢嘅「紅酒密友」、麗新集團主席林建岳（肥仔岳）近期都受到連串大字報「追殺」，喺本港多個地方不時出現針對肥仔岳嘅大字報。話口未完，尋日上環西港城對開行人天橋又再出現大字報，仲要係落足膠水黐到實一實。

有市民報料，話尋日上晝十一點左右，喺上環信德中心通去西港城嘅行人天橋，出現咗多張針對肥仔岳嘅大字報，大字報以打印機列印。由於嗰度途人絡繹不絕，唔知係咪內容太震撼，吸引唔少途人駐足觀看，睇到竊竊私語，好多仲睇到目瞪口呆，唔通真係咁好睇？

究竟大字報內容講啲乜？係真係假？相信當事人或睇過嘅人最清楚，但重點係，既然肥仔岳已經將件事交畀律師處理，點解有人仲唔驚，膽敢冒險周圍貼呢啲大字報呢？呢點認真耐人尋味。咁多途人睇過呢啲大字報，加上一傳十、十傳百，會唔會令人信以為真呢？