政壇：梁卓偉踩周一鑊卸膊

特首辦主任梁卓偉尋日出席一個青年團體舉辦嘅座談會時，本來主題係分享佢由行醫到從政嘅經驗，點知講講吓竟然變咗狂踩前上司、食衞局局長周一鑊。

本身喺加拿大攻讀醫科嘅佢，話細細個已對音樂產生濃厚興趣，除練得一手好鋼琴外，仲參加過兒童合唱團擔任男童女高音。接住，佢竟然用疑以嘲諷嘅口脗，話佢之前做副局長嘅食衞局有唔少「唱得之人」，擺明暗寸前上司周一鑊早前喺東華籌款活動中，唱《忘不了你》唱到走音兼甩嘴。

頻撲炮製「維景巨星匯」

跟住佢愈講愈興起，話自從上任副局長以嚟，真係好似局長個花名咁，每日都有好多鑊要孭。雖然佢冇講到出口，唔通係寸局長每周一鑊畀好多鑊佢孭？佢憶述自己首日上任，就遇着毒奶粉事件，本來佢對住咁多支鎂光燈，唔多唔少都要講番啲客套說話，點知傳媒完全冇興趣聽佢講嘢，只係狂追問點處理毒奶粉問題，搞到佢好冇癮。

講到當年H1N1流感喺維景酒店爆發，佢嗰日本來放緊假，都要走勻晒各大電視台，向公眾解釋番件事，都咪話唔攰。後來有朋友同佢講，從未見過一個香港官員，會夜媽媽十一點上電視做直播，講笑咁話睇住佢做「維景巨星匯」好過睇「維港巨星匯」，因為前者一毫子製作成本都唔使。梁卓偉當時咁忙，周一鑊去咗邊呢？

台下有學生問佢做官要有乜嘢條件，佢話面對不理性、不公平嘅言論時，要不慍不火，保持中庸之道，千祈唔好失去理智，衝動行事喎。臨完場佢不忘講句，做官要有sense of duty（責任心），唔好做違背道德倫理嘅事，唔知係咪暗喻周一鑊唔好卸膊呢？對於幾位特首參選人嘅睇法，佢就話自己站喺問責官員立場，不予評論。