放寬交津不到位 膠官扶貧假惺惺

終於認衰咯喎！係吖，有錯就要糾正，做男人Ａ字膊，做公職無腰骨，好樣衰o架！

大家咪誤會，太一叮唔係講緊唐英年。無錯，唐唐嘅僭建醜聞愈揭愈臭，呢鋪佢點都走唔甩，就算佢低莊到搵老婆過橋，都救唔番嘅喇，根本唔值得再嘥口水喺佢身上。太一叮今次想講嘅係唐唐嘅舊同僚、勞工及福利局局長張建宗。

各位放心，唔係個個高官都係鍾情私建地下行宮嘅好色男，張建宗所犯嘅唔係「感情缺失」，亦唔係「誠信缺失」，而係「政策缺失」。太一叮講緊乜？咪係鼓勵就業交通津貼計劃囉，當局最初預期有接近二十二萬人申請，但係因為申請門檻鬼死咁高，結果只得兩萬五千人遞表，獲批嘅更加只得一萬六千人，你話係咪失敗吖！

好嘞，交津計劃原意係鼓勵就業，結果好多基層無法受惠，計劃形同虛設，立法會議員梗係鬧爆啦。經過連月拉鋸，張建宗終於跪低認衰，宣布放寬申請門檻，將資產審查上限調高至綜援額嘅三倍，平均上調六成半，以一個六人家庭為例，上限調高至十九萬八千元。住戶入息限額就參考上年第四季嘅最新住戶入息數據，增幅平均超過一成，預計下月實施。呢嗱嗱嗱，石頭不踢不會滾，高官不插不做嘢，又一實例。

不過咁呀，交津申請門檻調低，真正有幾多打工仔受惠，仍然係好大嘅疑問。大家知啦，交津入息審查係以家庭為單位計算，如果閣下嘅另一半人工稍為好少少，接近一萬蚊，咁就算你嘅個人入息啱啱符合條件都一樣冇資格申請，事關加起嚟一定超出門檻，到頭嚟又係嘥聲壞氣！

所以話啫，港府放寬門檻不到位，根本就係到喉唔到肺。港府扶貧假惺惺，只係為咗虛應民意，而唔係真心幫助基層！

交津交津，太一叮諗起市面有一款飲品嘅樽以軟膠製造，等大家扭成一團，方便丟棄。嗱，交津計劃推行至今，成件事被嚴重扭曲，同樣成為一件廢料，而主事官僚就係膠官，而且唔係軟膠，係硬膠，頭腦死枯枯，心腸冷冰冰。

嗱，張建宗，如果你唔想被冠以膠官之名，快快認真研究點樣先至可以幫到基層勞工，唔係嘅話，小心被掟落垃圾桶呀，叮！