on.cc 東方互動主頁

SUN世代：海味王子「包」起業績

蘇啟國（Kenneth So）大學畢業後，便進入四大會計師事務所任職，經過多年經驗累積，半年前毅然辭去會計工作，回巢協助打理家族的海味生意。面對新挑戰，Kenneth有自己的一套，憑着細心觀察、凡事發問、親力親為，將生意打理得頭頭是道，他更立志要帶領家族事業闖上另一個高峰。

雖然Kenneth自小跟隨父親進出海味店，但對經營生意始終是門外漢，他深明自己有很多不足之處，需要逐一學習，因此他非常喜歡觀察周遭的事物，及養成凡事發問的個性。Kenneth認為任何人都有值得學習地方，上至行家、長輩，下至下屬或朋友，都是他的學習對象。

投身社會多年的他，由於善於觀察，多年來從不同企業看到很多的成功小秘訣。「我一返嚟做，就將公司啲packing（包裝）全部換過。」因行街時看到酒店禮物包的包裝很高貴，非常吸引，他於是嘗試去改變公司原本的產品包裝，務求將公司的產品在市場上重新定位。

落手落腳解決問題

除了硬件革新外，Kenneth亦十分注重軟件的配合。「開始用啲新packing時，成日都覺得啲同事包得唔靚。」當仔細觀察後，他會與負責的同事溝通，了解做得不好的原因。「有時發現我嘅idea諗得太理想化唔work，好似啲冬菇嘅size唔係隻隻一樣，入盒時係會有影響。我就要重新諗吓每盒嘅分量，點樣先會令到成個packing靚啲。」除找出問題所在，他還會落手落腳做一次，看看是否可行或作出改善。

別以為Kenneth愛發問的性格是與生俱來，原來小時候的他是怕醜仔一名。「細個嗰陣，我見到大人同埋外國人都唔敢講嘢o架，仲會專登行開，同埋我個人好慢熱，可能要到食完一餐飯先夠膽出聲。」

Kenneth的父親為了訓練其膽量，在他十幾歲時就經常帶他出席行家及商界舉辦的不同活動，例如婚宴及公司周年晚會等。「爸爸會推我出去同佢啲生意朋友傾偈，起初都唔知講咩好，咪扮大人同佢哋講吓生意上嘅嘢囉。」

在港完成中三後，他便隻身到美國求學。「嗰邊老師好鼓勵同學多啲表達自己嘅意見，講得多就唔再怕喺人面前講嘢。」經過爸爸的特訓及美國讀書的經歷，Kenneth開始愈來愈有自信，亦愈來愈敢於發問，從中學到很多不同的事，令他在不同領域上都取得成功。