政壇：經紀再上街抗港股加時

七大經紀會尋日舉行新春團拜，人山人海，唯獨港交所主席夏佳理同行政總裁李小加雙雙因事缺席，係咪同班中小經紀不滿港股加時有關就唔知嘞，但班經紀已決定响港交所今個月二十九號舉行董事局會議前，作「垂死掙扎」。證券及期貨從業員工會已決定咗喺二十八號，即係開董事局會議前一日，再次上街遊行示威抗議港股加時，企圖向港交所施壓。

該會會長林德明話今次會號召七大經紀會加入一齊遊行，初步已獲部分經紀會同意，佢好希望能團結業界，要求港交所暫時擱置第二階段加時，並且重新諮詢意見。佢好有信心今次遊行人數會比上次多，而「遊街」路線會同上次去港交所交請願信唔同，今次係由遮打花園出發，遊行目的地係新政府總部。

立法會金融服務界議員詹培忠就話，好希望港交所能從善如流，維持個半鐘食飯時間，至於午休時間點安排，就由港交所決定。