政壇：搞搞政：鐵頭仁參選 泛民鬼打鬼

白鴿黨主席「鐵頭仁」何俊仁號稱代表泛民主派參選特首，但事實上唔少泛民中人根本唔放佢在眼內。社區發展動力培育尋日公布一個特首參選人民望調查，鐵頭仁民望包尾唔算係新聞，但又暴露咗泛民鬼打鬼。

街工立法會議員梁耀忠早就講明唔會喺小圈子選舉中投票，尋日去發布會仲遲到早退，兼且對鐵頭仁冷嘲熱諷，成日話要提升市民嘅民主意識，但睇下上次特首選舉邊個贏就知，而調查都見鐵頭仁嘅支持度較弱，佢咁講擺明寸鐵頭仁參選根本係嘥氣。社民連嘅吳文遠亦話，鐵頭仁日日批評唐、梁，就等於幫手營造到個選舉好似好有認受性咁。

同場白鴿黨副主席「單雞」單仲偕聽到黨主席畀人咁踩法，即時面都黑晒，仲批評有關民調係遊戲，根本係個唔科學嘅調查喎。佢仲死撐話泛民今次唔止夠票提名候選人，又成功搞咗初選，已經完成七、八成任務，又話喺初選投票嘅三萬幾人都係泛民支持者，如果依家唔參選，普選時未必動員到大家喎。