政壇：新西醫生大啖豬油撈飯
醫管局經常教病人要食得健康，就少啲病痛，但新界西聯網總監盧志遠尋日搞嘅傳媒團拜，安排嘅食物真係嚇一跳。聯網喺「食神」梁文韜位於元朗嘅大榮華酒樓筵開三席，揀咗有新界特色嘅圍村菜，經常喺酒樓打躉嘅韜韜當然要出嚟介紹吓啲美食喇，但菜式除咗有雞、鴨、魚外，就連食得多好易有膽固醇嘅豬油撈飯都有，認真唔健康。
原來豬油撈飯係部分新界西醫生嘅童年集體回憶，佢哋話細路仔時代，阿媽要買舊肥豬肉炸油，再用啲豬油嚟撈飯，愈講愈有感情。韜韜仲話，旗下九龍灣分店都有唔少熟客係公院醫生，但就記唔清楚佢哋啲名！