與其護淫半遮面 不如為淫為到底

古人話，「眾怒難犯，專欲難成」，呢句說話點解？睇吓壹淫媒咪知咯。壹淫媒旗下免費報紙《爽報》渲染色情暴力，荼毒青少年，成為千夫所指，遭全城圍攻，炮聲隆隆，就係眾怒難犯嘅最佳例子喇。

呢，尋日立法會教育事務委員會和資訊科技及廣播事務委員會召開聯席會議，話題係「傳媒辨識教育及含不雅內容的免費報章」，總共有二十個團體出席，其中絕大部分團體怒斥現時淫審制度形同虛設，影視處執法歎慢板，對屢犯不改嘅「積犯」懲罰過輕。

冇錯嘞，《爽報》賣弄色情，宣淫販賤，舊年九月獻世冇幾耐，影視處已收到二百零九宗投訴，當中廿三件物品被淫審處評定為第二類不雅物品，但依家仲未有任何懲罰，當局任得淫媒繼續逍遙法外。太一叮諗極都唔明，民間團體群情洶湧，要求嚴懲淫媒嘅呼聲一浪高於一浪，當局一味詐傻扮懵，究竟仲想拖到幾時？

影視處處長劉明光仲死撐，話佢哋已經好快作出檢控，但司法程序要交畀法庭喎，一腳就將個波踢畀司法機構。其實，執法又好，司法又好，係人都知佢哋同淫媒一向沆瀣一氣，狼狽為奸嘅喇。就以《爽報》廿三單涉及不雅嘅畸士嚟講，法庭排期到四月先至恢復審理，好明顯係玩拖字訣，拖拖吓又係不了了之。嗱，立法會議員梁美芬就講得啱嘞，港府與影視處互相推莊，根本係不負責任，佢認為應加設黃牌、紅牌等吊銷牌照嘅制度。

話時話，如果真係設立吊銷牌照制度，違反《淫褻及不雅物品管制條例》已經過百次嘅壹淫媒早就消失喇，又點可能繼續橫行無忌，害人害物吖。難為當局兩年幾前煞有介事咁進行咗一輪公眾諮詢，話要改革淫審制度喎。其實，所謂諮詢根本係做騷咁做，當局除咗決定增加淫審處審裁員，以及延長審裁員任期之外，其餘乜都唔郁，你話喇，咁嘅改革有乜意義吖？正如有團體批評，港府對修例一拖再拖，連第二輪諮詢都拖到無影無蹤，淫賤傳媒就繼續為所欲為。

所以話啫，香港今時今日烏煙瘴氣，風化案無日無之，固然多得淫賤黎唔少，而包庇淫媒嘅港英餘孽更加係居功至偉。計太一叮話齋，當局與其虛虛偽偽，猶抱琵琶半遮面，不如為淫為到底，索性向壹淫媒發個淫賤牌照，等佢可以打正旗號，名正言順宣淫販賤，咁咪唔使怕畀人話包庇淫媒囉，叮！