SUN世代：Figure達人自求我道

許多成功故事的主角都鼓勵年輕人，想學有所成就要每事問，不厭其煩地告誡「唔識就問到識」。Figure設計師Tim Tsui卻反其道而行，不喜凡事問人，愛看書自學︰「你問人，人哋未必教得你十足，都係講番佢嘅心得。你始終要親身去學去試，先可以有完整嘅經驗，同解釋到件事點樣由無到有。」

Tim一畢業就走進廣告公司由低做起，從事設計工作。但他並不是設計學院出身，對設計技巧、理論等毫無概念。若果將職場比喻成田徑場，他深知當與同行在同一條起跑線起跑，想爭取優勢就要更努力，比人跑得更前︰「其他人夠鐘就收工，你咪坐多兩個鐘先走 ，留低睇自己想學嘅嘢，肯學肯練，就比人早學識更多新設計技巧。」

造出個人風格

在創作行業近十年，他由毫無設計根底的新人，晉升至公司高位，讓他發揮創意，涉獵圖像、網頁等設計。但他漸漸發現，真正主導每個創作的不是自己，而是客人︰「每次構思咗啲idea，都畀marketing嘅人改到面目全非，咁樣係違背創作原意。」因客人「大晒」，創作成品往往跟原來的意念相去甚遠，原創者難免心灰意冷，他亦由此萌生創業念頭。

二○○○年，香港興起Figure熱，Tim同樣熱衷這潮流，但當時的Figure大多是美式風格，「買唔到完全啱心水嘅Figure，就想親手設計，造自己風格嘅公仔。」他於是自學造Figure，畫設計圖、雕泥公仔，做銅模、再搪膠上色，反覆試驗︰「畫圖之後，要將2D變成3D，有啲位原來係整唔到出嚟，整六、七個先出到一個滿意嘅﹗」他花了半年時間，一手一腳製作五隻Figures，舉辦小型展覽。

最爛未必最糟

兩年後他辭去工作，全心全意發展Figure事業。初期，他跟其他新冒起的Figure設計人一樣，以人作主角。為了突圍，他將人變成猩猩，就成了現在極具風格的品牌主角。改變背後有其意念，原來是反映社會現實︰「人吸入毒氣後變成猩猩，卻依舊熱愛graffiti，拿着噴漆。現實社會入面，各人有唔同原因變成猩猩，但其他人都好忙，唔會去諗各人嘅原因，淨係睇到佢變咗猩猩。」

因主攻海外市場，他經常到日本、歐美等地參展。一次法國舉辦的潮物展，主辦單位臨時改動，他的作品竟由壓軸變開場，「準備時間少咗，我五日無瞓過覺，趕起二十幾隻Figure。」原來人生覺得最爛的事情，也未必是最糟，「展覽時，Figure迷反應好好，接多咗好多定單。」這個突如其來的危機，因他全力以赴，結果帶來連串機會，成功打開海外市場。

Tim Tsui's Profile

現職︰Da TeamBronx創辦人

興趣︰逛博物館、graffiti、網球