政壇：搞搞政：漠視反雙非聲浪 周一嶽民望插水
內地孕婦湧港產子，搞到本港醫院壓力沉重，更激到本地孕婦兩度上街示威請願，但政府遲遲唔推出有效措施回應市民訴求，反而激化咗中港兩地居民之間嘅矛盾，尋日港大公布最新嘅民調，結果顯示曾蔭權團隊嘅官員又係民望插水，跌得最深嘅係食物及衞生局局長周一嶽，支持佢做局長嘅跌七個百分點咁多。
港大民意研究計劃喺月初電話訪問咗一千名市民，發現市民對雙非嘅反對聲浪愈烈，相關官員嘅民望亦愈低，好似周一嶽嘅支持率下跌咗七個百分點，只得百分之四十三；反對佢做局長嘅受訪者就上升咗五個百分點。煲呔曾嘅支持度評分為四十八點三分，比上次下跌，屬表現拙劣。
