政壇：丘成桐斥鬍鬚曾亂派錢
鬍鬚曾有最廢財爺之稱，任財爺以來幾乎年年計錯數、錯估盈餘，舊年向每位市民派發六千蚊更搞到尾大不掉，蜚聲國際嘅港產數學大師丘成桐尋日毫無保留地批評鬍鬚曾嘅派錢計劃，話對香港長遠發展毫無助益，十分浪費，倒不如將資源撥給大專院校培訓人才，避免將來被內地大學超越。
丘成桐話，港府近年對高等教育投放嘅資源不足，相反內地嘅高等院校如北京大學、清華大學得到嘅資助就愈來愈多，雖然目前內地院校所獲嘅財政支援不及香港，但按現時趨勢，再過五年香港院校嘅財政實力就會被內地超越，如此香港院校想吸引優秀人才將漸見困難，分分鐘要靠內地輸入人才。