政壇：長毛「布殊」廟街撐枱腳

立法會議員梁國雄（長毛）情人節晚同美國前總統喬治．布殊撐枱腳食飯？有讀者尋日喺油麻地廟街一間大牌檔見到佢哋，仲見布殊身旁有兩、三個外籍保鏢保護，搞到街上嘅途人紛紛駐足拍照，之後仲有人將兩人同枱食飯嘅合照上載到社交網站，唔通長毛榮登社民連主席後，布殊都要來港請佢食飯？

睇真啲呢位「布殊」塊面怪怪哋，堂堂前總統踎大牌檔都有啲唔合理，事後證實係一個美麗嘅誤會。因為呢位「布殊」真名叫Steve Bridges，係美國著名諧星，專長化妝模仿名人，佢○六年曾經喺美國白宮記者協會餐宴中同真嘅布殊上演咗一次「真假布殊」。長毛話同Bridges係首次見面，獲邀參加一啲創意活動，可能食飯係活動之一。但Bridges出現嘅地方，附近都有收音咪及攝影機，睇嚟似拍戲多啲，長毛知唔知自己入咗鏡o架？