政壇：揀「梁粉」定「唐果」

特首選舉尋日進入提名期，邊個可以由表態參選者成為合格候選人，就睇佢哋可以出示幾多張提名票喇。尋日泛民嘅何俊仁先拔頭籌，剩低嘅梁振英同唐英年有幾多提名票成為各方關注嘅焦點，手握一百四十七票特首選委提名嘅民建聯係雙方爭取嘅大票倉，不過，建仔日前已經講明容許黨員自由提名，即係佢哋鍾意揀「梁粉」定「唐果」都得，建仔呢招自由散打真係絕，不過四圍打聽下，先知道原來事出有因。

分兩派難約束

據講，建仔黨大聲音多，面對各種不同聲音，黨內領導層都唔知點收科，眼見提名期已至，建仔領導層又知道難以約束黨員，所以焗住決定畀黨員自由提名，但此舉可能會令黨內嘅挺梁或挺唐派互相攻擊，勢成水火。

建仔前日開會時，卒決定畀黨內選委自由提名特首參選人，據聞北區區議員劉國勳及觀塘區議員洪錦鉉等人已經率先簽署提名畀特首參選人梁振英，有唐營中人聞風後都不敢怠慢，即時打畀未決定取態嘅民記區議員「拜票」。

雖然建仔放寬限制，畀黨員自由提名特首參選人，但呢一着亦間接導致梁、唐兩大陣營各自搶攻建仔黨員，甚至有令建仔成員分裂為兩大派系之虞，一個黨出現咁嘅情況真係好少見。

據聞黨主席譚耀宗（譚sir）都有啲擔心，所以做好事前消毒工作，表明大家可以選擇提名或不提名，倘若有人唔提名都希望大家互相尊重。其實譚sir言下之意，都係唔想黨員因為唔同提名而自相殘殺，如果真係因為咁不和，建仔內部真係要好好檢討喇。