新聞自由熄燈 港府用心黑暗

香港警察「公安化」，箝制新聞自由愈來愈明目張膽。假如，太一叮話假如，假如有一日，「一哥」曾偉雄突然要接受「休假式治療」，假如突然精神病發，隨時大家都未必會知發生乜嘢事，因為香港嘅新聞自由正在不斷被箝制，叮！

無錯，記者係社會看門人，如果社會事件冇傳媒及時報道，好多真相就會不見天日。可惜嘅係，港府倒行逆施，竟然視傳媒為眼中釘，千方百計打壓新聞自由。嗱，繼警隊同消防「熄機」，即係轉用數碼通訊之後，救護亦喺本月一日照辦煮碗，以數碼化改善通訊系統為名，截斷傳媒得知案情嘅渠道，然後選擇性發放資訊，意圖將傳媒操弄於股掌之間。

港府發放資訊到底點樣黑箱作業呢？離譜咯，單係統計今個月首五日情況，已經發現延報例子一籮籮。好似話二月一日嘅黃大仙有人昏倒案件咁，由案件發生到通知傳媒足足遲咗十八個鐘。十八個鐘頭，如果病人係最廢財爺曾俊華，因新一份預算案惹來劣評如潮而心臟病發，佢做完手術出埋院，傳媒都未知啦！

又好似上水彩園邨早前發生駭人血案咁，保安員被狂徒刀劈而亡，新聞夠晒轟動。但係你估警方最初同傳媒點講呀？搞笑咯，係「傻人發現」案件！警方就真係傻傻地嘞，好彩行兇者當場被制服啫，如果唔係，市民不知就裏，隨時死得人多！

警方延報案情，消防同救護亦都唔好得幾多，話就話突發事件每半小時發布一次，之但係案情資料少到唔恨。車禍啦、困升降機啦、火燭啦，只係簡單列出時間、事件同地點，連有冇人受傷都唔講，極為窒礙採訪安排。港府嘅行徑同向傳媒塞耳蒙眼無分別，目的顯而易見，就係要箝制新聞自由。

警方熄燈，消防熄燈，家陣救護亦熄燈，港府操弄資訊更加為所欲為。難怪連大學新聞系學生都擔憂，公眾知情權逐漸被削弱，令佢哋嘅前途同社會陷入黑暗！

計太一叮話齋，知情權熄燈，社會陷黑暗，不過，最黑暗嘅係港府用心。咪話太一叮唔提醒你哋，中港兩地之所以有分別，就係香港有新聞同言論自由，港府自毀長城，香港遲早玩完o架咋，叮！