政壇：蔡李惠莉隨時嫁女娶新抱
香港婦協尋日舉行春節聯歡會，年年包場請食飯嘅賭王何鴻燊，今年人冇到，但禮照到。全場一百二十圍酒席，由佢同二太藍瓊纓贊助。場內見到「玩具大王」蔡志明太太蔡李惠莉，講起龍年宜嫁娶，佢笑言千金蔡加怡同男友拍拖幾年，感情穩定，公子加讚亦有甜蜜女友汪圓圓，只待仔女開聲，馬上可以辦喜事。
工業家蔣震千金蔣麗芸大爆往事，話說當年與仍是男友嘅梁海明首次度情人節，對方竟然忘記book枱食飯，最後行到去政府大球場嘅餐廳先有位，認真搞笑。
太子珠寶鐘錶主席鄧鉅明（左起）、鄧太、蔡李惠莉、朱太同鐘錶業總會主席朱繼陶新春喜相逢。
廠商會副會長顏吳餘英（右起）、鄭明明同蔣麗芸等都好期待有個甜蜜嘅情人節。