政壇：競爭法拉票蘇錦樑潛水

剝咗牙嘅《競爭法》仍然唔討好，該局（工商及旅遊科）常任秘書長黃灝玄就四出拉票，唯獨身為局長嘅蘇錦樑隱咗形唔知去咗邊。

正如中聯辦上星期宴請建制派立法會議員時，主任彭清華就提到本港今年有幾個重要嘅議案要喺立法會通過，又舉例話其中一個係《競爭法》，咁嘅提法好唔尋常，好明顯就係幫蘇錦樑箍建制派嘅票，叫大家唔好搞咁多嘢啦。

泛民主派好關注《競爭法》中獲豁免嘅法定機構名單，據聞商務局今日就會公布呢份名單，當中包括爭議最大嘅貿發局、市區重建局、機場管理局、房委會同房協等，但海洋公園就要受監管不獲豁免。我哋都問過海洋公園，佢哋就話冇意見喎。

相信呢份名單一出，泛民一定更加不滿，所以最近黃灝玄都好頻撲，要四出約見傳媒同落足牙力游說泛民黨派，而建制派方面又有西環出面拉票，究竟擔大旗嘅蘇錦樑做過乜？