水署唯利是圖 村民苦候甘露

香港自稱「國際都會」，原來盛名之下，其實難副。唔講唔知，今時今日仲有唔少角落被遺忘，生活環境惡劣，連乾淨食水都成為奢侈品，要靠沖廁水、山坑水維生，簡直係香港之恥！

講緊嘅唔係荒無人煙嘅山旮旯，而係位於大嶼山、有幾百人居住嘅稔灣村同長沙欄村，離豪宅區只係一街之隔咋。講出嚟都冇人信，原來稔灣村村民多年來只能靠愉景灣水塘供水，講白啲即係飲人哋攞嚟淋花同沖廁嘅水，問你驚未！

長沙欄村情況更差，只能望天打卦。井水唔夠用就由山邊儲水池頂檔，「山坑水」平時已經黃黃哋，遇着落雨更大鑊，泥沙混雜，睇見都驚。話時話，山坑水同沖廁水含有大量微生物，如果冇煲滾就飲，隨時中招，就算煲滾至飲，都令人反胃喇。仲有吖，一旦受到化學污染，分分鐘搞出人命o架。

連生活用水咁基本嘅問題都解決唔到，唔通水務署唔知？叮！唔講猶自可，講起把鬼火。原來早喺上世紀八十年代尤德做港督嗰陣，兩條村已經同愉景灣一齊向政府爭取供水，但水務署厚此薄彼，對呢兩條村一直不聞不問，就算村民同愉景灣傾掂雙方合作，當局照樣關人個關。

有冇離譜啲吖，小小一條自來水管，幾百村民等足廿幾年都冇聲氣，難為政府仲好意思話「執政為民」，懶政累人就真！水務署仲死撐，話呢兩條村同現有供水系統距離甚遠，工程費昂貴，冇跟進係出於成本效益考慮喎。

叮佢個鎯鎯！如果呢兩條村係豪宅，居民非富則貴，水務署仲敢唔敢話冇成本效益吖？其實，全香港最冇資格講成本效益嗰個，根本就係水務署自己。署長馬利德管理無能，佢個部門幾乎年年畀審計署炮轟。淨係前年，因為偷水問題嚴重，水費少收八千萬元，另外水錶唔準又損失八千萬元，兩樣加埋庫房進帳少咗一億六千萬元，唔通呢啲就係水務署嘅所謂成本效益？

仲有，本報記者早排去供港東江水嘅最後一站深圳水庫實地視察，發現污染失控，水庫旁邊有人違規種菜，有人洗衫洗褲，農藥化肥同洗衣粉源源不絕流入。東江水連年加價，污染連年惡化，納稅人連年使錢買污水，水務署喺水質監管方面做過啲乜？

水錶失靈冇人理，水源污染話之你，村民冇水懶得理，計太一叮話齋，水務署應該改名做「水皮服務署」至啱，叮！