政壇：政商定格：郭炳湘太座撐生命熱線
港人感情問題多多，輔導機構生命熱線過去半年接到嘅求助電話中，關於兩性感情及婚姻問題嘅求助電話就多達四成，生命熱線理事會主席、新鴻基地產非執董郭炳湘太太郭李天穎前日喺尖沙咀文化中心搞咗場籌款慈善騷，郭太都有現身，佢啱啱去完新加坡探愛女，為咗今次籌款活動，幾忙都要趕返港喎。去到個活動，佢仲同已故全國政協副主席霍英東嘅大女霍麗萍相見歡。
膳心連（Foodlink）創辦人黃林碧瑢幫手為生命熱線籌款多年，更同郭太係多年老友，依家郭太仲做埋膳心連主席，兩人拍住將酒店食肆剩餘嘅新鮮食物，送畀貧困人士嘅功德發揚光大。黃太希望城中善長仁翁繼續捐輸，令機構可提供更多服務。
郭李天穎（左）在活動中遇見霍麗萍（右），來個開心合照。
黃林碧瑢創辦膳心連，既有愛心又有創意。