九月立法會選舉戰雲密布,新界東鄉紳打算自行派隊已唔係秘密,最近又傳出曾於○八年參選立法會嘅沙田區議員龐愛蘭,未來或會加入沙田地區政團公民力量(公記),藉以增加立法會選舉嘅贏面。新界東局勢微妙,盛傳會代表鄉事派出選嘅韋國洪亦來自公記,如果龐愛蘭真係加入公記,咁公記啲票畀邊個好呢?
據消息話,鄉議局主席劉皇發同一班來自新界東嘅鄉事領袖,上星期日齊集大埔林村密斟大事。據了解,發叔喺會上繼續力撐原居民自行組隊出選,仲話如果組得成,資助一百萬元都冇問題喎。
同建制派關係密切嘅龐愛蘭,被傳或加入公民力量。